2
تیڈا رووَن کوڑ دا رووَن ہے، اجاں روون جو گا حال نوی
تیڈے زور جتی تیکوں بار ڈتم ڈٹھا در داں داگڑ دھال نوی
جینکوں جوڈیواں ذمے وارتاں نیں، میڈی قدرت دا بھائیوال نوی
میڈا شکوہ ہوش سنبھال تے کر،توں شاکر ہیں اقبال نوی
2
میڈا دلبر پیار دیاں گالھیں ہن، گھت کنڈے تو لوں کیا فائدہ
کوئی اَ ن بن ہے تاں ساڈی ہے ،اگوں جگ دے پھولوں کیا فائدہ
توں اپنی جاہ میں اپنی جاہ ، ودے آسرے گولوں کیا فائدہ
جہڑی گنڈھ شاکر ہتھ نال کھلے، چک نال چاکھولوں کیا فائدہ
3
ربا ڈہدا بیٹھاں تُرتُر کے تیڈی دنیا تے جو تھینداپے
کوئی بلھے شاہ ،کوئی مہر علی ،باہو سلطان سڈیندا پے
کوئی کوٹ مٹھن داشہزادہ وچ جگ دے ڈیکھ چمینداپے
ہک شاکر ہے تیڈی دنیا تے جیہڑا مویاں لکھے جنیداپے
4
اعتبار نہ کر انہاں سوہنیاں تے اج کجھ ہوند ن کل کجھ ہوندن
منہ زور مزاج دے مالک ہن، گھڑی کجھ ہوندن پل کجھ ہوندن
انھاں حسن دیاں بھریاں بوتلاں دے گل کجھ ہوندن تل کجھ ہوندن
ہِن شاکر مثل کر یہاں دے،پھُل کجھ ہوندن ،پھَل کجھ ہوندن
5
جیویں میکو ں آن روایا ہئی ،اینویں میں وانگوں پل پل روسیں
ہک واری روکے تھک بہیں ،ول دل ڈکھسیا، توں ول روسیں
نہ ڈکھڑے آن ونڈ یسیا کوئی ،تو ں لاکندھیاں کوں گل روسیں
بس شاکر فرق معیاد داہے، میں اج رونداں، تو ں کل روسیں
6
میں قیمتی ہاں پر بے فائدہ کہیں سُک دریادی پُل وانگوں
بیٹھا تُر تُر ڈھداں باغاں کوں کہیں کھمب کھتھڑے بلبل وانگوں
سٹیے کاوڑنال بھکا میکوں کہیں اجڑی سیج دے پھل وانگوں
میں شاکر اپنے مالک کوں ہاں یاد معمولی بھل وانگوں
7
وڈی تانگھ رکھیم تیڈی عزریلا ،بیٹھاں تانگھ لہا اُتوں تو ں آگئیں
ساری عمراں روندیں گزری ہے ملئے سکھ دا سا ہ اُتوں توں آگئیں
اج قسمت ڈکھ داشاکر کوں ڈتے گول دواتوں توں آگئیں
مسیں قاصد یار منا کے آئے، ودا بہندا ہا اُتوں توں آگئیں
