خدایا خود حفاظت کر تیڈا فرمان وِکدا پئے
کتھائیں ہے دین دا سودا ، کتھائیں ایمان وِکدا پئے
کتھائیں مُلاں دی ہٹی تے ، کتھائیں پِیراں دے شوکیس اِچ
میڈا ایمان اے بدلیا نہیں ، مگر قرآن وِکدا پئے
اِتھاں لیڈر وپاری ہِن ، سیاست کارخانہ ہے
اِتھاں ممبر وکاؤ مال ہِن ، ایوان وِکدا پئے
میڈے مُلک اِچ "خدا" ڈالر ، میڈے ملک اِچ "نبی" پیسہ
اِتھاں ایمل نہ کوئی آوے ، اِتھاں مہمان وِکدا پئے
نہیں ساہ دا کوئی وساہ شاکر ، ولا وی کیوں خدا جانڑے
ترقی دی ہوس دے وِچ ، ہر اِک انسان وِکدا پئے
شاکر شجاع آبادی
