ماہر فلکیات نے زمین کے قریب ایک چھوٹا سیارہ دریافت کیا ہے جو زمین کے ہی مدار میں سورج کے گرد چکر لگا رہا ہے۔
’دو ہزار دس ٹی کے سیون‘ نامی دو سو سے تین سو کلومیٹر چوڑا پتھریلا سیارچہ، خلا میں زمین سے زیادہ دور نہیں ہے لیکن کشش ثقل کے باعث ایک ایسے مقام پر ساکت ہے جہاں سے اس کا زمین سے ٹکرانے کا کوئی خطرہ نہیں ہے۔
فلک میں اس سیارچے کے مقام کی وجہ سے اس کو ٹروجن ایسٹرائڈ کا نام دیا گیا ہے۔ اس سے قبل ٹروجن ایسٹرائڈ صرف عطارد، نيپچون اور مريخ کے سیاروں پر پائے گئے ہیں۔
عام طور پر یہ تاثر ہے کہ خلانوردوں کا ٹروجن ایسٹرائڈ کے قریب جانا ممکن ہے لیکن امریکی خلائی ادراے ناسا کی ٹیلی سکوپ سے دریافت کیے گئے اس ٹروجن سیارے کے متعلق کہا جا رہا ہے کہ اس تک خلائی جہاز کے ذریعے پہنچنے کے لیے بہت زیادہ ایندھن کی ضرورت پڑے گی۔
ٹیلی سکوپ سے اندازہ لگایا گیا ہے کہ فی الحال یہ سیارہ دنیا سے تقریباً آٹھ کروڑ کلومیٹر کے فاصلے پر ہے اور آئندہ بھی اس کا دنیا سے فاصلہ ڈھائی کروڑ کلومیٹر سے کم نہیں ہو گا۔
ماہرین فلکیات کی ٹیم کے مطابق یہ ایسٹرائڈ اگلے دس ہزار سال تک سورج کے گرد گھومتا رہے گا۔
ماہر فلکیات کرسٹن ویلے نے بی بی سی کو ٹروجن ایسٹرائڈ کے متعلق بتایا ’ان سیاروں کو دنیا سے دریافت کرنا مشکل ہوتا ہے کیونکہ یہ اتنے بڑے اور متحرک نہیں ہوتے اور دنیا سے دیکھنے پر سورج کے بہت قریب ہوتے ہیں۔‘
ان کا کہنا تھا ’لیکن ان کو خلا سے دریافت کرنا آسان ہے اور مستقبل میں ہماری کوشش ہوگی کہ ہم مزید اس طرح کے سیارے دریافت کریں۔ ہمارا خیال ہے کہ بہت سے دیگر ٹروجن ایسٹرائڈ دنیا کے قریب ہیں اور متحرک ہیں سو اس لیے ان تک خلائی طیاروں کے ذریعے پہنچا جا سکتا ہے۔‘
