تونڑیں خیر نہ ڈیویں خیر ہووی نہ تروڑ فقیر دا کاسہ
میں منگتا ہم تہوں آن گھدم تیں تئیں حاتم دا پاسہ
نہیں دولت زر دی حرص حوس ڈے جام وصال دا ماسہ
بُک بھر ڈے نہیں دریا کُھٹدا نہ ٹور اقبال پیاسا
2
اساں منگ منگ منگدے تھک پئے ھیں
تیڈے عرش تیں پہنچی آہ کائنی
یا رول فضاء وچ رل گئی اے
یا وت اسمان تیں راہ کائنی.
اساں عاشق ھیں تیڈی آمد دے ساڈے
ھجر دی وسمی بھا کائنی.
یاشائق یاردا حج کروا
یا کڈھ گھن ساہ پرواہ کائنی.
3
پُچھ حال نہ ساڈی زندگی دے پئے بھوگ بُھگیندوں کیا پُچھدیں
بن سائیں دے ساڈی کیا زندگی پئے جھٹ گُزریندوں کیا پُچھدیں
نت سامنڑیں رکھ تصویر تیڈی پئے مونجھ لہیندوں کیا پُچھدیں
پا سہرے احسن دردیں کوں پئے جشن منیندوں کیا پُچھدیں
4
ہِک سوبھ سویر دی دیر ہے چن انجام ڈیکھیں سرداراں دے
ست ماڑ توں ڈھاسن دھرتی تے ایہے مالک محل میناراں دے
اوں روز حشر دے ویلے کوں کوءی دیر نہیں اج کل سمجھیں
جڈاں ہتھ ہوسن مظلوماں دے گروان ہوسن زرداراں دے
